जामखेड (प्रतिनिधी – नासीर पठाण )
अयोध्या येथील प्रभू श्रीराम लल्लाच्या मूर्तीची प्राणप्रतिष्ठा व भव्य मंदिर लोकार्पण सोहळया निमित्त जामखेड शहरात बीड कॉर्नर येथे श्रीराम मंदीराची प्रतिकृती तसेच प्रभू रामचंद्र व छत्रपती शिवाजी महाराज यांच्या पुतळ्यास पुष्पहार अर्पण करून अभिवादन करण्यात आले तसेच सायंकाळी श्रीरामाच्या गाण्यावर लेझर शो दाखवण्यात आले. तसेच शहरात ठिकठिकाणी प्रभू श्रीरामाचे फोटो लावून अभिवादन करण्यात आले व महाप्रसाद वाटप करण्यात आला.
शहरातील श्रीराम मंदिरात सकाळी साडेपाच वाजता अभिषेक करण्यात आला. सात ते साडेअकरा पवमान स्वाहाकार, साडेअकरा वाजता पूर्णाहुती, बारा वाजता अयोध्येतील श्रीराम लल्ला मूर्ती प्रतिष्ठापणा प्रक्षेपण १२.२० ला महाआरती व महाप्रसाद, दुपारी ३.०० वाजता गीत रामायण..भजन ( महिला वर्ग ), संध्याकाळी ७.०० वाजता श्री रामरक्षा आणि दीपोत्सव अयोजीत करण्यात आला.
जामखेड तालुका शिवसेनेच्या वतीने प्रभू श्रीरामाची प्रतिकृती करून अभिवादन करण्यात आले. शिवसेना तालुकाप्रमुख संजय काशीद यांनी यावेळी १९९२ साली कारसेवेमध्ये सहभागी असलेल्या कारसेवकांचा गौरव केला यानंतर महाप्रसाद वाटप करण्यात आले.
