नगर:
मी माझ्या आमदारकीचा राजीनामा देऊन 2019 बसवला डाव उधळला आहे. आता कोणत्याही परिस्थितीत लोकसभा निवडणूक जिंकून उधळलेला डाव सावरण्याची जबाबदारी पारनेरसह नगर दक्षिणेतील माझ्या समर्थकांची आहे. जीवाचे रान करा, मतदारांपर्यंत पोहचा, विरोधी कार्यकर्त्यांना आपलेसे करून विश्वास निर्माण करा. काहीही झाले तरी आपल्याला जिंकायचे आहे असे भावनिक आवाहन महाविकास आघाडीचे नगर दक्षिणचे उमेदवार निलेश लंके यांनी केले आहे.
निलेश लंके यांची सध्या स्वाभिमान जनसंवाद यात्रा सुरू असून यात्रेच्या शेवटच्या टप्यात सोमवारी सुपा गावात झालेल्या महाविकास आघाडीच्या पदाधिकारी-कार्यकर्ता मेळाव्यात निलेश लंके यांनी आपल्या समर्थक कार्यकर्त्यांना काहीसे भावनिक होत प्रचारास आता खरी सुरुवात होणार असून गाफील राहू नका, बूथ कमिट्यांवर काम करा, तुतारी चिन्ह घराघरात पोहचवा, विरोधात काम करणाऱ्यांना पटवून देत आपलेसे करा, एकट्या पारनेर-नगर विधानसभा मतदारसंघातुन एक लाखावर लीड मिळाले पाहिजे या दृष्टीने कामाला लागा अशा सूचना केल्या. यावेळी जेष्ठनेते दादाभाऊ कळमकर, शशिकांत गाडे, संदेश कार्ले, बाळासाहेब हराळ, भगवान फुलसौंदर आदी उपस्थित होते. जनसंवाद यात्रेचा समारोप शरद पवार यांच्या उपस्थितीत नगर शहरात 19 एप्रिल रोजी होणार असून यानिमित्ताने होणाऱ्या सभेत मोठे शक्ती प्रदर्शन केले जाणार आहे.
